ایواز طاها فلسفه ایله مشغول اولور، علمی و بدیعی نثر یازیر. ا. طاها 90-جی ایل لرده “یول” درگیسینین قوروجوسو و باشیازاری اولموشدو. سونرالار آذربایجان جومهورییتینده “جاهان” درگیسینین تمل داشینی قویموش, او ژورنالین باش یازارلیغینی اؤز اوزهرینه گؤتورموشدو. هابئله او، 2004-جی ایلدن “یارپاق” قزئتینی چیخارماغا باشلامیشدی. “یارپاق” میللی حکومت دئوریلدیکدن بری تام آذربایجان تورکجهسینده بوراخیلان ایلک قزئت اولموشدو.
طاهانین ایندییهدک ایکی یوزه یاخین ایریلی-خیردالی یازیسی (مقالهلری، اؤیکولری، رومانلاری، تنقیدلری، ائسسهلری و ترجومهلری) آیری-آیری درگیلر و قزئتلرده چاپ ائدیلمیشدیر. آذربایجان تورکجهسینده، فارس و اینگیلیس دیللرینده یاییملانان بو یازیلاردا، داها چوخ فلسفه و ادبیات و سیاست قوووشاغیندا یارانان مسئلهلر آراشدیریلمیشدیر. بو درگیلر و قزئتلرین بعضیسی بونلاردیر: “یول”، “جاهان”، “شهریار”، “دونیا ادبیاتی”، “وارلیق”، “آذری”، “شرق”، “منیم عائلم”، “یارپاق”، “وراوی”، “آراز”، “بهار زنجان”، “تک صبیر”، “آوای اردبیل”، “اولدوز”، “آلاتوران”، “یئنی آذربایجان”.
“یول”، “جاهان” و “یارپاق” نشر اورگانلاری ایله یاناشی ایکی کیتاب ایواز طاها شؤهرتینین تملداشیدیر. بیری، “قورشون هاردان آچیلدی”، او بیریسی ایسه “شعر وارلیغین ائویدیر”. باخمایاراق کی، آدلاری سرّ کیمی ساخلاناراق یاییلمامیش کیتابلارینین داها ائتکیلی اولاجاغینا اینانیر. کیچیک حجملی رومان ژانریندا یازیلمیش بیرینجی کیتاب، تکنیکی و بدیعی اؤزهللیکلری ایله یاناشی ساغلام بیر نثر دیلی سرگیلهییر. گونئی آذربایجان بدیعی نثرینین قیتلیغیندا بئله بیر کیتاب گونئی نثر مدنیتینین گلیشمهسینده ائتکیسیز اولمایا بیلمزدی. ایکینجی کیتاب شعر وارلیغین ائویدیر کی، فلسفی نظریهلر ایشیغیندا گونئیده شعر مدنیتینین یایغین اولماسینین سرّینی آچماق اوچون نظری سببلر آختاریر. کیتابدا شعریمیزین نثره اوستونلویو، شعرله نثر دیلینین کؤکلو فرقلری، شعرله ایلگیلی ایدئولوگییانین ائتکیلری، شعرین آماج و یا آراج اولماسی، و شعرله فلسفهنین ایلگیلری گئنیش آراشدیریلیر. 2007ـ جی ایلده بیر سیرا گونئیلی ضیالیلار، یازارلار و شاعیرلرین “ایلین کتیابی” کیمی دیرلندیردیکلری “شعر وارلیغین ائویدیر” ایندییهدک ایکی کز باکی و تبریزده باسیلیب. اونون اوچونجو باسیقیسی ایسه اسکی الیفبا ایله تبریزده و لاتین گرافیکاسی ایله باکیدا باسیلماقدادیر.
داها گئنیش بیلگی اوچون “کیملیک” کئچیدینه باخ!